ڕۆژی پێنج شەممە ٨ی ڕەشەممەی ١٣٩٨ كۆچی خۆری ئاخوند خامنەیی ڕێبەری ڕژیم دوای نزیك مانگێك بەسەر بڵاوبونەوەی ویروسی كڕۆنا لەئێراندا، بەشێوەێكی چاوەڕوان نەكراو دەركەوت، ئەویش جیاواز لەجارەكانی دیكە، بەتەنیا وە بێئەوەی هیچ ئاپۆرای بەكرێگیراوانی لەدەور بێ.
خامنەیی كە پێشترهەڵۆێستی لەپێوەند بەنەخۆشی و ویروسی سامناكی كڕۆنا نەبوو، ئیتر نەیتوانی هیچ نەڵی هەربۆیە بەهۆی بەربڵاوی كارەساتەكەو بڵاوبوونەوەی ویروسی كڕۆنا لەسەرانسەری ئێران و مردنی دەیان كەس، ناچار بوو لێدوان بدا.
بەڵێ خامنەیی لەژوورێكدا بەتەنیا كە ترسێكی زۆر لێنیشتبوو، لەڕێگەی تلویزیۆنی ڕژیم باسی بڵاوبونەوە ویرۆسی كڕۆنای كردو لەدوای سپاس لە كارمەندانی نەخۆشانەكان، ووتی هەوڵی باش دەدەن بۆ چارەسەر كردنی نەخۆشەكان. ئەو هەڵۆێست و قسانەی خامنەیی نەك نەیتوانی بەرپرسایەتی كاربەدەستانی ڕژیم و كەمتەرخەمیان لەبڵاوبوونەوەی ویروسی كڕۆنا وەشارێ، بەڵكو بووە هۆی سەلماندنی ئەو ڕاستیەی كە بەرپرسانی رژیم بەتێكڕاو خامنەیی بەتایبەت، لەبڵاوبونەوەو تەشەنە كردنی ویروسی كڕۆنا لەئێراندا تاوانباری سەرەكین. چونكە لەرۆژانی یەكەمی سەرهەڵدانی ویروسی كڕۆناو هەواڵ و زانیاریەكان لەسەر مەترسی و هەرەشەی ئەو بەڵایە بۆ سەر خەڵكی ئێران، بەرپرسانی ڕژیم و خامنەیی بەئەنقەست خۆیان لەباس کردنی پاراست، وە تەنانەت رێگەیان لەهاتوو چۆی فڕۆكەی نەفەر هەڵگری ماهان كە سەر بەسپای پاسدارانە بۆ ووڵاتی چین نەگرت و هەوڵیاندەدا قەیرانی وایرۆسی كڕۆنا وەك هۆیەك بۆ نزیك بوونەوەی زیاتر لەحكومەتی چین بەكار بێنن، وە بە ناوی هاوكاری كردنی چین، ویستیان وەڵامی بەناو چاکەو پشتیوانی ئەو وڵاتە بدەنەوە كە هێندێك جار پشتگیری ڕژیم دەكات لەقەیران و لەو كێشانەی كاربەدەستانی ڕژیم بۆ خۆیان خۆلقێنەرین. ناردنی هەزاران دەمامك (ماسك) لەئێرانەوە بۆ چین، وەك هاوكاری ڕژیم، یەكێكە لەگاڵتەجارانەترین نەوعی هەڵۆێستی دەسەلاتدارانی ئێران، چونكە هەر لەو كاتەی دەمامك (ماسك) دەنێردرا بۆ چین، لەناوخۆی ئێراندا خەڵك پێویستی لەڕادەبەدەری بەدەمامك هەبوو. وەك ئاشكرایە قەیرانی كەمی دەمامك لەئێرانداو زیادبوونی نرخەکەی كێشەێكی گەورەی خەڵكە لەئێستادا كە بە پێزانیاریەكان ژمارەیەك لەبەكرێگیراوانی رژیم بەرپرسن لەبەرز بوونەوەی نرخەکەی. كاربەدەستانی ڕژیم بەو خۆش خزمەتیەیان بەحكومەتی چین، هیچ كە نەیانتوانی كارێكی بەكەڵك بۆ خەڵكی ئەو وڵاتە بكەن لەبەرانبەریشدا، بوونە هۆی زیان گەیاندن بە خەڵكی ئێران.
یەكێكی دیكە لەهۆكانی شاردنەوەی بڵاوبونەوەی ویروسی كڕۆنا لەئێران، ئەوە بوو تابتوانن خەڵك لەسەر سندوقەكانی دەنگدانی شانۆی هەڵبژاردنی مەجلیسی یانزدەهەمی ڕژیم كۆبكەنەوە، بەڵام كاتێك شانۆگەریەكەیان بێ بینەر بوو وە كەمترین ڕێژەی خەڵك بەشداری كرد، كاربەدەستانی ڕژیم هۆكەیان بۆ ترسی خەڵك لەویروسی كڕۆنا گێڕایەوە، وەك ئەوەی بەرپرسانی ڕژیم لەبیریان چوبێتەوە كە پێشتر یا هیچ زانیارێكیان بەخەڵك نەداوە وە ئەگەر زانیاریان بەخەڵك دابێت، هیچ كات ئەوەیان ڕانەگەیاندوە كە ویروسەكە گەیشتۆتە ئێران.
بێگومان بێهەڵۆێستی و كەمكاریەكانی ڕژیم لە حاست ئەو ویروسە، سەرچاوەكەی بۆ دژمنایەتی دەسەلاتداران لە خەڵكی ئێران و لەبەرانبەردا گرینگیدانە بەخۆیان و دەسەڵاتە نامەشروعەكەیان .
لەكاتێكدا لەوڵاتی چین ویروسی كڕۆنا بڵاو بوەوە، چەند شار بەتایبەت شاری (ووهان) بەتەواوی قەرەنتینە كراو رێگەی هاتوچۆ بەدانیشتوانیان نەدرا و هەموو ئەو كەسانەی تووش ویروسەکە بوون، بەشێوەێكی زۆر كاریگەر خرانە ژێر چاوەدێری و هەروەها حكومەتی چین لەماوەی 10 رۆژدا گەورەترین بیمارستانی بۆ نەخۆش و ویروس لێدراوان دروست كرد. بەڵام كاربەدەستانی ڕژیم گاڵتە بەباسی قەرەنتینەو گرتنە بەری ڕێوشۆێنی كاریگەر بۆ چارەسەری ئەو قەریرانە مەترسیدارە دەكەن. ئاخوند رۆحانی سەرۆك كۆماری ڕژیم لەڕۆژی 7ی ڕەشەممە دەڵێ، نیازمان نیە هیچ شارێك قەرەنتینە بكەین و تەنانەت ئەمجارەش هەوڵیدا قەیرانی ویروسی كڕۆنا ببەستێتەوە بە پیلانی دژمنانی ڕژیم.
هەروەها (نمكی) وەزیری بێهداشتی ڕژیم قەرنتینەی بەكارێكی دواكەوتوانە ناو هێناو ڕایگەیاند هەر شارێك كە ویروسی تێدا بەربڵاوە قەرەنتینە ناكەین. بەڵی ئەوە شێوەی هەڵۆێستە و كارە نابەرپرسانەی دەسەڵاتدارانی ڕژیمی ئێران بەرانبەر بەو بەڵا مەترسیدارە، گەندەڵی و نەزانی و خەیانەتكاریان بەرانبەر بەخەڵكی ئێران نیشان دەداو لەبەرانبەریشدا هەڵۆێست و كاری بەجێ حكومەت و دەسەلاتدارانی چین بۆ چارەسەری قەیرانی ویروسی كڕۆنا كە لەئێران بەربڵاوترو مەترسیدارتریشە، باس دەكرێ غەمخۆری و دڵسۆزی بەرپرسانی چین بۆ خەڵك و وڵاتەكەیان دەردەخا.
لەكۆتاییدا لایەنێكی دیكەی گاڵتەجاری دەسەلاتدارانی ڕژیم، خۆ بەنەخۆش نیشاندان و ویروس لێدراویی چەندین كاربەدەستی حكومەتە، كە زۆر وێ دەچێ ئەوەش یەكێكی دیكە لەفێڵ و چاوبەستەكانی كاربەدەستان و دەسەلاتداران بێ، كە گۆیا ئەوانیش نەخۆش دەكەون و ئەو ویروسە دەیانگرێتەوە، تەنانەت یەكێك لەبەرپرسانی ڕژیم كە گۆیا تووش ویروسی كڕۆنا بووە، دەڵێ كڕۆنا وەك دیموكراسی وایە فەقیرو دەوڵەمەندو بەرپرس و غەیرە بەرپرس ناناسێ. وەك پێشتر باسكرا، زۆر وێ دەچێ ئەوەی كە چەند بەرپرسی ڕژیم تووش كڕۆنا بوون پیلانی خۆیان بێ بۆ كەم كردنەوەی ڕەخنەكان لەسەر دەسەڵاتی ملهورو دیكتاتۆر لەئێراندا. هومێدوارین ئەو ویروسە مەرگ هێنەرو مەترسیدارە لەخەڵكی ئێران بە دووربێ بەڵام ئاخوندە ملهوڕو دەسەڵاتدارە ستەمگەرەكان كە چل ساڵە بوونە ویروس و بەڵا بەسەر خەڵكەوە كۆتاییان پێ بینێ.
