ئاژانسی هەواڵنێریی فارسی رژیمی ئێران باسی لە ڕوودانی چەندین تەقینەوەی بەهێز لە ڕێڕەوی باشووری گەرووی هورموز کرد و بانگەشەی ئەوەی کرد کە ئەو کەشتییە نەوتهەڵگرانەی لە ڕێڕەوە "ڕێگەپێنەدراوەکان"ەوە تێدەپەڕین، بەر مینە دەریاییەکان کەوتوون. تا ئێستا هیچ زانیارییەکی سەربەخۆ سەبارەت بە ژمارەی کەشتییە زیانپێکەوتووەکان، هۆکاری تەقینەوەکان و ئاستی زیانە ئەگەرییەکان بڵاو نەکراوەتەوە.

بەپێی ڕاپۆرتی فارس، تەقینەوەکان لە یەکەم کاتژمێرەکانی بەرەبەیاندا ڕوویان داوە و ئەو کەشتییە نەوتهەڵگرانەی زیانیان پێگەیشتووە، بە وتەی ئەم ئاژانسە، پێشێلی یاساکانی هاتووچۆی ئێرانیان لەم ڕێڕەوە کردووە.

ئەم ڕاپۆرتە لە بارودۆخێکدا بڵاو دەبێتەوە کە هێرش لەسەر کەشتییە بازرگانییەکان لە کەنداو و گەرووی هورموز لە ڕۆژانی ڕابردوودا ڕووی لە زیادبوون کردووە. ڕێکخراوی ئۆپەڕاسیۆنە بازرگانییە دەریاییەکانی بریتانیا ڕۆژی چوارشەممە ٧ی ئۆکتۆبەر ڕایگەیاند لە دووریی نزیکەی ٩٤ کیلومەتریی باکووری شارۆچکەی “مەدینەتولشەمال”ی قەتەر، کەشتییەکی نەوتهەڵگر بەر چەندین تەقەمەنی نەناسراو کەوتووە و کوژراو و برینداریش تۆمار کراون. بەرپرسانی پەیوەندیدار ڕایانگەیاند کە لێکۆڵینەوە لەم ڕووداوە دەکەن.

کۆمپانیای زانیاریی دەریایی “ڤانگارد” ئەم کەشتییەی وەک نەوتهەڵگر و هەڵگری ماددە کیمیاییەکانی “ئاسەرز” بە ئاڵای ئەنتیگوا و باربوداوە دەستنیشان کردووە. بەم حاڵەشەوە، بەڵگە بڵاوکراوەکانی تا ئێستا هیچ پەیوەندییەکی ڕاستەوخۆ لە نێوان ئەم هێرشەی ئاوەکانی باکووری قەتەر و تەقینەوە ڕاگەیەندراوەکانی گەرووی هورموزدا نیشان نادەن.

بەپێی ڕاپۆرتی ڕویتەرز، لە ٢٨ی سێپتەمبەر تا ٥ی ئۆکتۆبەر، بەرزترین ئاستی هێرش و هەڕەشە دژی کەشتییە نەوتهەڵگرەکان، لە دوای دەستپێکردنی جەنگی ئەمریکا و ئێران لە ٢٨ی فێبریوەرییەوە، تۆمار کراوە. لەم ماوەیەدا لانیکەم ١٢ حاڵەتی هێرش، هەوڵی هێرشکردن یان بێزارکردنی دەریایی تۆمار کراوە.