لاوانی شۆرشگێر!
کادر و ئەندامانی رێکخراوی لاوانی خەبات!
بەڕێزان ئەمڕۆ یادی کۆچی دوایی رێبەرێکی نەتەوەیی و ئایینی دەکەینەوە کە هەر لە سەرەتای تەمەنی لاویەتی بە هەست کردن بە بەشخۆراوی نەتەوەکەی بۆ ڕزگاری و بەختەوەری گەلی کوردو دەستەبەرکرانی ئازادی تێ‌ بکۆشێ‌ و دەست لە ژیانی خۆش و بێ کێشە بۆ خۆی و بنەماڵەکەی هەڵگرێ‌ و ژیانی پر لە شانازی پێشمەرگایەتی و بەربەرەکانێ لەگەڵ داگیرکەرانی خاک و نەتەوەکەی هەڵبژارد و لەو رێگایەدا هەموو ژیانی خۆی کردە قوربانی.
بەرێزان مامۆستای رێبەر و دامەزرێنەری سازمانی خەبات هەر لە سەرەتای چوونە ناو کاری سیاسی و حیزبیدا باوەرێکی تەواوی بە وزە و توانای لاوان هەبوو بە کردەوەش لە دوای دامەزراندنی سازمانی خەبات ئەو بیرۆکەی سەلماند و لاوان بە بەردەوامی دەور و نەقشی خۆیان لە بەرێوەبەری ئەرک و کارە سازمانیەکاندا پێ سپێردراوە و لاوانیش بەرپرسیارەتی دیاریان لە ئەستۆ بووە و ئەرکەکانی خۆیان بە باشی راپەراندووە و سەلماندوویانە کە کاریگەری فکر و هزری جەنابی مامۆستایان بە بەردەوامی لەسەر بووە.
مامۆستا سەیید جەلالەدین حسێنی تەنیا رێبەرێکی سیاسی نەبوو بەڵکوو بیرمەند، ئەدیب و شاعیرێکی بە توانای گەلەکەمانە کە بەرهەمەکانی سەرچاوەی بەکەڵک و گرینگن و پێویستە لاوانی ئێمە کەڵکی لێ وەر بگرن و وانەی کوردایەتی یەکگرتوویی و پیکەوە ژیانی لێ فێر بن و فکر و ئەندیشەی خۆیان بە بەهرە گرتن لە زانستی ئەدەبی وسیاسی مامۆستا بەهێزتر و کامڵتر بکەن.
هۆگرانی رێبازی جەنابی مامۆستا،
لە کاتێکدا بە دڵێکی پر لە خەم و پەژارەوە نۆهەمین ساڵیادی کۆچی دوایی مامۆستای رێبەر و ئەدیبی ناوداری گەلەکەمان دەکەینەوە کە بارودۆخی رژێمی ئاخوندی ئێڕان لە هەموو کات زیاتر لە قەیرانی سیاسی و ئابووریدایە و زۆر وێ‌ دەچێ‌ رۆژەکانی کۆتایی تەمەنی نگریسی خۆی تێپەر بکات هەر بۆیە دەسەڵاتدارانی ئەو ڕژیمە فشارەکانیان بۆ سەر خەڵک بە گشتی و لاوان بە تایبەتی زیاتر کردووە و لاوان لە هەموو لاێکەوە کەوتوونەتە بەر پەلاماری هێزەسەرکوتگەرەکان. بێگومان رژێم بەم چەشنە کردارە دژە مرۆییانەی خۆی دەیەوێت لاوان لە ئەرک و کاری سەرەکی خۆیان دوور بخاتەوە، بەلام بە خۆشیەوە لاوانی ئێمە چۆکیان بۆ داگیرکەران دانەداوە ولە ئێستادا لە هەموو کات زیاتر وشیارانە ئەرکی سەر شانی خۆیان بەڕێوەبردوەو و رۆژ لە دوای رۆژ زیاتر دەگەنە ئەو باوەرەی کە تاکە رێگای کۆتایی هاتنی ستەم و چەوساندنەوە کۆتایی هێنان بە دەسەڵاتی رەشی رژێمی ئاخوندییە و تاکوو ئەو رژێمە نەڕوخی نە گەلی کورد و نە هیچ کام لە نەتەوەکانی تری ئێران بە ماف و داوا رەواکانی خۆیان ناگەن.
لە کۆتاییدا جارێکیتر ئێمە رێبوارانی رێگای پر لە شانازی جەنابی مامۆستا و قوتابیانی قوتابخانەی سازمانی خەبات بەڵێن دووپات دەکەینەوە کە درێژەدەری ٠۸ەو رێبازە پر لە شانازیە بین و تاکوو رووخانی رژێمی کۆنەپەرەست و دیکتاتۆری ئاخوندی لە هەوڵ و تێکۆشان بەردەوام بین.
جارێکیتر بەرز و بەرێز بێت نۆهەمین ساڵیادی کۆچی دوایی جەنابی مامۆستا سەیید جەلالەدین حسێنی
بروخێ رژێمی ئاخوندی ئێران
سەرکەوێ خەباتی رەوای گەلەکەمان
رێکخراوی لاوانی خەبات
دەستەی بەڕێوەبەری